الوصايا العشر للإنفلونزا.. والفارق بين إنفلونزا الخنازير

مع بداية شهر الشتاء تزداد الأمراض، خاصة عند الأطفال وقليلي المناعة، بسبب تغير الجو وانتشار الفيروسات، لاسيما الإنفلونزا وما تردد عن عودة إنفلونزا الخنازير.
الدكتور أحمد الخطيب أخصائي طب الأطفال يقدم الوصايا الـ10 للإنفلونزا وذلك على النحو التالي..
-بشهادة الجميع، الدكاترة و الناس والمجتمع، إنفلونزا العام الحالي من أعنف أدوار البرد على مدار السنين الماضية، ويمكن السبب تأخر تطعيم الإنفلونزا أو تحور جيني بسيط Antigenic drift .
– دور البرد العادي اللطيف الذي نعرفه (زكام على رشح على احتقان خفيف ودفيان ويذهب بكول ليمون وتنام وانتا واخد قرصين بانادول تصبح عرقان) ده اختفى خلاص .. احنا في موسم الكوماندا الكبير، الإنفلونزا !
– بينما دور البرد بيبدأ بسيط أو متوسط وبعد كده يخف بالتدريج أو – نادراً- يقلب بالتهاب بكتيرى؛ العكس تماماً، الانفلونزا بادئ من يومه عملاق، مجرم، بادئ بحرارة توصل ٣٩ وتزيد، تكسير و رعشه و نشر في الجسم ووجع عضلات، مهدود، في الأطفال الصغيرين رشح على شوية احتقان وكحة خفيفة، في الكبار صداع وهمدان، دماغ شغالة مش بتنام.
– الحالات اللى هقولها دى مع أول شك فى وجود انفلونزا مهم جداّ تاخد علاج الفيروس (حتى قبل ظهور نتيجة التحليل لو اتعمل ) التاميفلو ، تامينيل ، أول ٤٨ ساعه ، ده بيقلل حدوث المضاعفات ، و بيقلل حجز المستشفى ؛ أى ارتفاع حرارة مفاجئ مع برد واحتقان حلق (أعراض انفلونزا )فى :
* طفل تحت ٥ سنوات – وبالذات ٢ – وبالذات تحت ٦ شهور
* أي طفل عنده حساسية صدر أو مرض مزمن فى الصدر
* أي طفل عنده مرض مزمن فى الكبد أو الكلى أو الأعصاب .
* أي طفل محجوز فى مستشفى بأعراض التهاب رئوى لغاية ما نتيجة التحليل تطلع .
* أي طفل الطبيب شايف لأسباب تتعلق بتاريخه المرضى إنه محتاج علاج الانفلونزا عشان مش هيستحمل المضاعفات.
– الفيروس ده بينتشر عن طريق الرذاذ ، والعطس ، والكحة والإفرازات الأنفية ، وكمان بيظل الفيروس مُعدى حال وجوده على الأسطح ، وبالتالى ، غسيل الأيدى بالمياه والصابون مهم جداّ بعد التعامل مع أى حد عنده برد ، البعد مسافة متر عالأقل أثناء التعامل ، ارتداء كمامة مفيد جداً جداً لو مضطرين ننزل أولادنا المدارس ، مسح الأسطح بكحول وماء فاتر مهم جداً بالذات غرفة المصاب .
– مصل الإنفلونزا مهم جداً جداً للوقاية ، الانفلونزا بيشتد أصلاّ ديسمبر ويناير فبراير وبيقعد لنص مارس ، اه هوا اتأخر بس بيحمى ٩٠٪؜ من أشهر سلالتين موجودين من ٧٠ سنة H1N1 و H3N2 (الإنسان والخنازير ) وهوا مسموح فى حساسية البيض خلاص مفيش خطر منه ؛ بيتاخد للأطفال من ٦ شهور لأى عمر بعد كده ، لو أول مرة يتاخد فى العمر بيبقى جرعتين ربع أو نص مل بينهم شهر ، تانى موسم (الشتا اللى بعده ) جرعه واحده فقط ( لو طفل ٩ سنوات فما فوق محتاج جرعة واحدة مش تتكرر بعد شهر).
– منقلقش يا جماعة ولا نثير الذعر ، اه الحالات كتير بس الحمد لله مش وباء ولا اجتياح زى ما حصل فى ١٩١٨ ولا ٥٧ ولا حتى ٢٠٠٩ ؛ احنا أقصى حاجة فى مرحلة تفشى outbreak ،، وكل المطلوب من المسئولين فى وزارة الصحة توفير ال ” تامينيل ” بكميات مناسبة للانتشار الموجود حالياً قبل ما يتحول لوباء لا قدر الله لإن مش فى مصلحة أى حد ان الدوا يتباع سوق سودا ب ٨٠٠ و ٩٠٠ و ١٠٠٠.
– الناس اللى مش لاقية الدوا هنعالج الاعراض ، الحرارة والكحة والرشح ، ونتابع ؛ هوا بيخف لوحده بإذن الله فى ٧-١٠ أيام ونادراً لما يكمل أسبوعين ؛ نتابع بس حدوث نضاعفات زى التهاب الأذن الوسطى والالتهاب الرئوى و الخلق والجيوب الأنفية ؛ البرد اليومين دول معاه شوية آلام فى عضلات الجسم وبالذات السمانة فى الأطفال وبيعمل “عرجه ” بسيطه فى المشى منقلقش تخف في يومين بس الكشف طبعاّ مهم لو حصل كده .
– بالنسبة للسلالات الموجوده حالياً السلالة اللى فى البشر H1N1 والمنتقلة من الخنازير H3N2 وجودهم طبيعى جداً لو عملنا تحليل للفيروس ولقيناهم عادى وفي مناعة منهم وبيخفوا باذن الله ؛ أما سلالة الطيور H5N1 و H7 و H9 فمن ساعة ما حصل وباء فى ٢٠١٣ متكررش تانى غير فى الصين . فمنقلقش و calm down وربك يسترها
– للمرة الدشليار … لله والله .. أى أم أو أصحاب حضانة شايفه ابنها أو بنتها بدأ حرارة ، عطس ، كحة ، نغيب اسبوع ، سوايل دافية ، علاج أعراض ، لإن وجوده فى الحضانة أو المدرسة هينقل العدوى لكل زمايله ، و الcycle تلف تانى وترجعله أما ينزل .. بالمناسبة مفيش أى مانع إن الطفل ياخد دورين انفلونزا من سلالتين مختلفتين فى نفس الشتا ؛ ناخد بالنا والله الحافظ.

تعليقات الفيسبوك